Buscando propiciar un diálogo entre argumentos xa asentados e novos puntos de vista que, nos últimos anos, foron xurdindo ao redor da polémica figura do eucalipto, esta obra, de elocuente subtítulo, achega ao tema unha perspectiva racional, desapaixonada e aberta ao entendemento. Nunha posta a punto detallada en explicacións e exemplos ilustrativos desde a ciencia á política, estas páxinas desmontan mitos e propoñen un enfoque actualizado, afastado de dogmatismos e posicionamentos radicais, que se pretendan definitivos. Polo demais, a obra recolle, e reflicte, a dilatada experiencia, coñecemento e fondo exercicio de reflexión do autor, nunca acomodado no tempo, ante a urxencia dunha reconsideración do eucalipto e as súas relacións coa contorna e o medio natural.