«Son ateo. Son anticlerical. Son un laicista militante, un racionalista contumaz, un impío rigoroso. Pero aquí me teñen, voando en dirección a Mongolia co ancián vicario de Cristo na Terra, disposto a interrogarlo sobre a resurrección da carne e a vida eterna. Para iso embarqueime neste avión: para preguntarlle ao papa Francisco se a miña nai verá o meu pai máis aló da morte, e para levarlle á miña nai a súa resposta. Velaquí un tolo sen Deus perseguindo ao tolo de Deus ata o fin do mundo».
Este é o arranque fulgurante deste libro único, que ninguén tivera a oportunidade de escribir, entre outras razóns porque o Vaticano xamais lle abrira de pao a pao as súas portas a un escritor. Pero, ademais de único, este é un libro de plenitude, onde o seu autor logra converter unha proposta insólita nun relato propio e maxistral: un thriller sobre o maior misterio da historia da Humanidade. Con esta novela sen ficción, Javier Cercas volve á súa liña máis persoal, na que logra enlazar as súas obsesións íntimas cunha das preocupacións fundamentais da sociedade actual: o papel na vida humana do espiritual e o transcendente, o lugar nela da relixión e a ansia de inmortalidade.